مين هو تامر الانسان ... مش تامر حسنى الفنان و رد على كل أسئلتكم (ردود جديدة كل يوم)

معظم الناس عارفة مين هو تامر حسنى
اللى ميعرفهوش هو تامر الانسان و الصديق و الاخ و الابن
المصرى الصعيدى أبو طبع حامى
هو ده تامر اللى انتم بتسألونى عنه و هو ده اللى هجاوبكم عليه

لأنى بصراحة مش بشوف مع تامر غير انه تامر مش تامر حسنى
الصاحب الجدع اللى وقفته بوقفة 100 راجل

تامر شخص هادى جدا و فى نفس الوقت شقى موت
بيموت فى الهزار و الضحك
أكتر حاجة بتعجبنى فى تامر حنيته و قلبه الابيض زيه زى الاطفال بالضبط

بينادينى يقولى يا دودده و انا بقوله يا تيكو و بقول لحسام يا سمسم
و ماما فاطمه بقولها يا بطوطه و رامى بقوله يا راموش

بيحب ال Hot Chocolate و بيموت فى شيكولاته مارس و جلاكسى
و بيعشق بطاطس Pringles دايما يقولى شيلى البتاع دى من قدامى انا هخلص عليها
بيحب البيبسى و ال seafood و ساندويتشات الجبنه بالطماطم
بياكل من أى حته و من عند أى حد
و بيلبس أى حاجه طالما لايقة عليه
بيختار لبسه بنفسه و بيعمل موضه خاصة بيه هو
بيروح فى كل مكان بنفسه و بيسوق عربيته

و معندوش بودى جاردز
ريتشارد مسئول عن تامر فى حفلاته و هو بيأمن حفلات كتير مش تامر بس
يعنى البودى جاردز اللى بيكونو موجودين من الحفلات و هو اصلا ميعرفهومش

ناس كتير بتفتكر انه مقضى ايامه لعب و هزار و خروج و ده مش حقيقى
تامر كان الاول شايل هم عيله كاملة
لما لقى نفسه ارتاح من الهم ده شال هم دينه اللى فيه ناس بتفهمه غلط
لما عمل حاجه تفيد دينه على قد ما يقدر و هو البوم الجنه فى بيوتنا
شال هم غزة و فلسطين
لما عمل واجبه تجاه فلسطين شال هم الاطفال
و حاول قد ما حاول يشارك فى مسح الالم عن الاطفال دول
شال هم بلاده و الشباب و الاطفال المحتاجين فيها
و دلوقت شايل هم الشباب اللى زيه اللى مستنيين فرصه

أول سؤال بتسأله انا عرفت تامر ازاى

انا و تامر أول ما اجتمعنا اجتمعنا على الخير
و علشان كده ربنا مباركلنا فى صداقتنا

سبب معرفتى بتامر كان محمود انتيمى العزيز
محمود جراح تجميل و متطوع فى Operation Smile
و أنا متطوعة كمستشارة اعلامية للجمعية و عضو مجلس ادارة
و تامر كمان كان قرر يطوع فى الجمعية
اتكلمت انا و هو و محمود فى الموضوع على التليفون
و رتبا كل حاجة على مدى 6 شهور
لا كنت شفت تامر ولا شافنى
و اثناء Operation Smile mission جه تامر
و انا كنت واقفة قدام الاسانسير واخدة بيبى لمعمل التحاليل
و بنوته تانية شبطانة فى رجلى

الاسانسير فتح لقيت تامر وراح قايلى "انت داليا" ازيك يا دوددة وحشتينى والله
قلتله ازيك يا تامر قاللى تمام هاتى عنك
و شال منى البيبى و نزلنا لمعمل التحاليل
و كملنا بقيت ال mission لعب مع الاطفال و يعيطو شويه
و يضحكوا شويه و شفنا الفرحة فى عيون أهاليهم
و دة أحلى أحساس

تامر طول عمره و العين عليه و ماشاءالله من نجاح لنجاح
مواقف تامر للخير مواقف شخصية مش بيعملها عشان هو تامر حسنى
بيعملها علشان هو تامر بس تامر الانسان مش مستنى رضا من حد
الا واحد
ربنا

تانى موضوع بتسأل عنه هو رحلة غزة

دايما الناس تقولى انت كنت رايحه و عارفه انك ممكن مترجعيش
و ازاى جتلك الجرأة و مخفتيش
مع انى واثقه ان اى حد فيكم لو كان مكانى كان عمل كده
و بعدين اخاف ازاى و انا مع اخواتى و احنا كلنا معانا ربنا

اليوم ده بجد غسل كل واحد فينا
ايوة كنت طالعة و عارفة انى ممكن مرجعش
و ممكن نتبهدل
بس كان هم كل واحد فينا اننا نساعد اخواتنا و نوصلهم
تامر قاللى يومها عارفة يا داليا اول مرة احس أغنية
"هوصلك حتى لو عارف انى ممكن أموت"
حسام قالنا مابلاش السيرة دى يا جماعة
قلتله و احنا نطول يا حسام دى تبقى احلى حاجه
تامر رد و قاله ده كده يبقى اسمه حسن الختام والله
طبعا حسام قلبها هزار و قالنا طب استاذن انا
الحق احضرلكم جنازة عسكريه تليق بيكم
بجد كنت بتمناها
و طالما ربنا كتبلنا نعيش يبقى لسه علينا واجب نعمله
و طول ما انا عايشه هدور على السبب اللى ربنا خلقنى عشانه و أعمله

أما المواقف اللى تضحك فى وسط كل ده و قبل سفرنا لغزه تامر كان مسافر دبى
يوم السفر لدبى الصبح كان تحت البيت عند تامر
فيه فى الشارع عند تامر حتة كلب زى السكر
كلب بلدى عادى خالص بس صحته ماشاء الله تامر متوصى بيه قوى
دايما يأكله ... المهم فأنا كنت بدى لتامر حطة (SCARF) فلسطينية
عائلة فلسطينيه بعتتها لتامر عن طريقى الحطة دى كانت بتاعة ابنهم الشهيد
و ابنهم كان تامر مثله الاعلى و اول ما سمعوا أغنية فلسطين
بعتوا الحطة بتاعة ابنهم لتامر و دى اللى ظهر بيها من ساعة دبى لدلوقت

المهم فالكلب ده أول ما يشوف تامر او اى حد من أصحابه بيفرح قوى و يفضل يتنطط
و تلاقيه حاشر منخيره فى كل حاجة بتحصل
فأنا بدى لمحمود فطار كنت عديت جبته و انا رايحة فالكلب ده بقى اتجنن و فضل يتنطط
قلتله خلاص معلش والله لو كنت اعرف كنت جبتلك أكل
و سلمنا و كل حاجة و لسه هركب عربيتى لقيت تامر طالع من شباك العربيه بيقولى
داليا خدى بقى رأفت معاكى هاتيله فطار انا بصيت لتامر و بصيت حواليا
و لقيت الكلب بيبوصلى و بيهزلى ديله قلتله انت رأفت؟ فضل يتنطط
طبعا تامر فطس من الضحك عليا و على ال Reaction بتاع الكلب
و والله خدته معايا و جبتله فطار
الكلب لونه بيج عشان لو رحتوا و جرى وراكم متتخضوش اليف جدا "ده رأفت"

أما بقى السؤال اللى بتسأله كتير
ازاى ندافع عن تامر لما حد يغلط فيه أو ان الناس فهماه غلط و متعرفوش كويس

انتم هنا فى اللافرز كام واحد؟ 160000 ؟
لو ليك اخ و الناس شايفاه غلط هتسكت؟ اكيد لا
لو اقنعت 10 بتامر زى ما انت شايفه يبقى اللافرز هيأثروا ايجابيا فى كام شخص؟
ميليون و نص
و لو الميليون و نص اتكلموا مع 10 عن حاجة واحد كويسة تامر عملها
يبقى بقوا كام؟ 15 ميليون؟ و هكذا
تامر الصفات الكويسة اللى فيه كتيرة قوى مع انى مش بشوف فيه حاجة وحشة
بس ياريت الناس متنساش انه مش ماكينة ده انسان
لو كلامهم سطحى حتى اتكلم معاهم و ممكن يبينوا انهم مش مقتنعين
بس لو قعدوا مع نفسهم هيفكروا فى كلامك
تامر أخوك هتسيب حد يغلط فيه و تسكت؟
انا ضد اللى يقولك سيبهم يقولوا
لا رد و خلى كلامك موضوعى و لو انت مقتنع بتامر بجد هتعرف ترد
و انا عارفة انك هتعرف ترد وواثقة فى كدة

السؤال اللى بتسأله برضه عن طموحاتى و أهدافى

طموحاتى ايه و ايه هدفى
هدفى الاول

انى نفسى لما أموت الناس تفتكرنى بالخير
ده هدفى و بعمل كل اللى أقدر عليه علشان أوصله

أما طموحاتى ان رسالتى توصل للناس كلها و رسالتى هى

ان احنا كلنا بشر ربنا خلقنا على أرض واحدة و هو بيخلقنا
مقالش ده أمريكانى ولا ده روسى ولا مصرى ولا حتى من كولالامبور
ربنا خلق كل واحد فينا انسان علشان يعيش و يعمر الارض و يساعد اخواته
و كل ما تساعد اخواتك تتحول من مجرد مخلوق لبشر ثم توصل لمنزلة انك تكون انسان
ربنا جمعنا فى أرض واحدة و احنا بنفرق نفسنا
بحب كل انسان بغض النظر عن لونه او جنسه او جنسيته او ديانته
ضد العنصرية بكل صورها بكره الظلم و ان حد يحسس انسان آخر بالدونية او انه أقل منه
نفسى مشوفش دمعة حزن فى عين اى حد و هعمل كل اللى ربنا يقدرنى عليه عشان احقق ده
نفسى مايبقاش فيه حدود ولا ناس بتموت عشان حتة أرض لان والله أرض ربنا مكفيانا كلنا
كل واحد لو فكر ان نفسه يدى ايه لاخوه بدل ما يفكر ياخد منه ايه
هنقدر فى يوم أكيد نغير شكل الحياه
و نرجع زى ربنا ما خلقنا اخوات على ارض واحدة من غير حدود قلبنا ابيض زى اول ما اتولدنا

هكملكم الردود على الاسئلة فى الردود الجايه

مين هو تامر الانسان ... مش تامر حسنى الفنان و رد على كل أسئلتكم (ردود جديدة كل يوم) Sign

مين هو تامر الانسان ... مش تامر حسنى الفنان و رد على كل أسئلتكم (ردود جديدة كل يوم) Sign

مين هو تامر الانسان ... مش تامر حسنى الفنان و رد على كل أسئلتكم (ردود جديدة كل يوم) Osedp6

» ممكن تفز دلوقتى بتذاكر حفل الفنان تامر حسنى فى عيد الحب 14/2/2010
» كليب تامر حسنى :. تامر عاشور :. بيغنوا يا حبيبتى يا مصـر :. من حفـلة DvD Q
» تامر حسنى ملك الموسيقى
» صور جديدة لملك و ليلى مع تامر
» من هو تامر حسنى؟