أنا مش "مزة".. صرخة نسائية على المعاني الجنسية

كلمة مزة بقت سلاح يستخدم ضد المرأة في مصر ، خلاص الجنس الأنثوي كله بقى بيصنف على انه مزة، والكلمة بقت على كل لسان وكل الأعمار والمستويات والطبقات الاجتماعية بتستخدمها.
مزة كلمة مقززة، ليها معنى جنسي، وهدفها اختزال المرأة في جسمها والتحقير من شأنها وفرض مكانة دونية ليها في المجتمع ، مش ممكن نطالب بحقوق مرأة أو ان الست في مصر توصل لمناصب قيادية وهي مجرد مزة! مين هينتخب مزة عشان تمثله في البرلمان؟ مين هيروح لدكتورة مزة عشان تعالجه ؟ مين هيحترم استاذة مزة بتدرسله ؟ ازاي المجتمع هيعاملنا باحترام وياخدنا بجدية واحنا واقفين نتفرج عليه وهو بيخترعلنا اسم جديد وبيفرضه علينا بكل وسيلة وفي كل مكان؟
لازم كل ست وكل بنت بتحترم آدميتها ترفض ان يتقال عليها مزة ، لازم نقف في وجه المجتمع الذكوري ونمنعه من اختزالنا في مجرد أجساد ، لازم كل واحدة تعلن أنها إنسان نوعها امرأة، مش مزة ، لازم كل واحدة تدافع عن كرامتها وتقول أنا مش مزة
دعوة لشطب هذه الكلمة البذيئة المحقرة من شأن المرأة من قاموسنا العامي المصري، وتصنيفها باعتبارها كلمة بذيئة
نحن نعترض على استخدام هذه الكلمة في الإعلام و الأغاني و الأفلام ، يجب أن تلقى المرأة المصرية الاحترام الذي تستحقه وألا تستسلم لعنف المجتمع وممارساته القمعية ومحاولة إذلالها وامتهانها وتشييئها

شاركونا لنعلنها صريحة : المرأة = إنسان نوعه أنثى
المرأة المصرية ليست مزة
بالبلدي.. أنا مش مزة