كلمات الاغنيه السودانيه قصه ريده بين اتنينبين مسلم ومسيحيه

قصه ريده بين اتنين بين مسلم ومسيحيه
احلف ليها بالاسلام وتحلف بالمسيحيه
ولي عقيده مابتتفات وديني كمان عزيز ليا
الا الريده مابتعرف قيود واديان سماويه
وتدخل في قلوب الناس زي افراح ربيعيه
انا شاب اسمر من السودان اصيل وقبيلتي جعليه
حفيد ناس ملو التاريخ قصص وامجاد بطولية
في أقصي الشمال شبيت هناك في قريه عاديه
اصلي واصوم واهدي الناس وجيت من اسره دينيه
صدري عريض سدر تربال وكل سماتي ريفيه
وعندي خشونه في صوتي وكمان معروفه أيديا
اجي والقاك بلا ميعاد سماتي فكري ريفيه
انتي مابتختلفي عن ناسنا الهناك في قريه عاديه
وفيها النيل وفيها نخيل وساقيه تنوح وطوريه
عينيك زي بنات بلدي وافراحك بطوليه
وبس لكن خضر عينيك ونحن عيونا خمريه
وصوتك انتي لما ينوح صوت اذان وقمريه
وفي خديك زهور نايرات مفتحه منقه هنديه
سألتيني عن السودان والخضره الطبيعيه
عن الابنوس وسن الفيل وغابات استوائيه
قالوليك وحوش ناسنا بياكلو الميته والحيه
انتي جيتي تحققي الرؤيه تشوف ادله مرئيه
سريع اتمازجت روحنا فاضت ريده وحنيه
أتبادلنا بالاحضان ودبتي هوي وغرام تيه
أتفارقنا من يومداك وما اتواعدنا بالجيه
شفتا الناس يشوفوني يقولو بحب خواجيه
شفت الناس يشوفوني يقولو بريد مسيحيه
بكره يسمعو ناسنا بالقصه قصه حب مسيحيه.
قصه ريده بين اتنين بين مسلم ومسيحيه
احلف ليها بالاسلام وتحلف بالمسيحيه
ولي عقيده مابتتفات وديني كمان عزيز ليا